ГЪАНИШАШВИЛИ МИХАИЛ / ЗАОМРЭ ИГЪЭКОЩЫК1ЫМРЭ

ГЪАНИШАШВИЛИ МИХАИЛ

ЗАОМРЭ ИГЪЭКОЩЫК1ЫМРЭ

 

Урысым Кавказыр ыштэн зырехъухьэм,

Адыгэм лъэубэкъур апэу тефагъ.

Бгыпэ бгъэжъ набгъор къызэрапхъыхьэ,

Зэо зэрапхъор къушъхьэм к1адзагъ.

Къарыу зэпэпшэп. Зэфэнчъэ онхэр.

Зэхэлъэдагъэх лъыпс псыхъо чъэрхэр,

Адыгэм ищэ къе1уатэ тхыдэр,

К1ыжьрэп адыгэ сэшхом пиупк1рэр.

Л1ыхъужъхэр маш1ом ижьыбгъэ хэфэх,

Мэш1уаем къуаджэхэр зэк1егъэстыхьэх,

Илъэсхэм илъэсхэр ыпэк1э афых,

Зэоныр зэонк1э зэтезэрэхьэ.

Л1ыхъужък1э пыижъым пэгъок1ми

Джыгытхэр мэфэхых, хэк1уадэх.

Зэпыу ямы1ахэу хьадэхэр уахътэм

Ик1ак1о псэхал1эу ч1еухъумэх.

Ык1эм мэш1уаем ш1ок1ыгъэхэр

Урысмэ рафыгъэх Ч1ыгужъым,

Псэоу къэнагъэ адыгэхэр

Рафых хык1э Осмэным.

Мы гъогури ахэм хьадэгъу афэхъугъ.

Хы Ш1уц1эр псэхэхэу къафыч1эк1ыгъ.

Пыим къык1эзрэ адыгэр тыдык1и

Л1эныгъэм ыфыгъ бгъу пстэук1и.

Къэнагъ ау адыгэр щэбзэщэ пхыгъэу.

Теубытагъ ошъогум яплъэгъу

Хымэхэс гупсэхэм. Лъагэ ягугъэхэр.

Ч1ыгужъым къэк1ожьы рафыгъэр.

Сэш1э, а уахътэр псынк1эу къэсыщт,

Тарихъым итхьапэхэр къыгъэнэфыщт,

Аслъаным ищырхэр къызэтехъощт,

Адыгэр ихэку щык1эжьыщт!

(Адыгабзэк1э зэзыдзэк1ыгъэр Л1ыпц1экъо Ларис)

Share Button